Վաղը Բրյուսելում` Եվրոպական ժողովրդական կուսակցության համաժողովում քննարկվելու է Հայաստանի հանրապետական կուսակցության` այդ համաեվրոպական կառույցին անդամակցելու հարցը։ Այնտեղ է հանրապետականների պատվիրակությունը, որի անդամները համոզմունք են հայտնել, որ հարցը դրական լուծում է ստանալու։ Ասենք նաև, որ այնտեղ` Բրյուսելում են Եվրախորհրդարանի նորընտիր նախագահ Մարտին Շուլցը, ինչպես նաև Եվրամիության հարցերով Թուրքիայի նախարար Էգեմեն Բաղըշը, որի մասին այս շաբաթ շատ ենք խոսել` կապված Հայոց ցեղասպանության վերաբերյալ նրա հայտարարությունների հետ։ Երկուսն էլ Բրյուսելում այս հարցին անդարադարձել են։ Բաղըշը հրաժարվել է պատասխանել իր նկատմամբ Շվեյցարիայում սկսված հետաքննության մասին հարցին: Շուլցը հայտարարել է, որ թուրքերը պետք է նայեն իրենց պատմությանը և քննեն այն: Եթե դա հանգեցնի այն եզրակացությանը, որ կատարվածը ցեղասպանություն է եղել, ապա Թուրքիան պետք է այն ընդունի, ասել է ևրախորհրդարանի ղեկավարը: Բայց բոլոր դեպքերում դա Թուրքիայի գործն է, ավելացրել է Եվրախորհրդարանի ղեկավարը։